[ايسر]

# السلام عليكم .. عندي بعض الاسئلة .. كنت عرضت بعضها في هذا الموقع الرائع .. ولكن لم اجد الجواب الشافي .. بالاضافة ان الاجابات كانت تخرج عن محور السؤال .. وسوف اعرض اسئلتي في خمسة نقاط .. واسال الله لنا جميعا الهداية ..
1. ربنا ينور بصيرتك كلمة ربنا ينور بصيرتك .. كله بيقولها لكله .. المسلم بيقولها للملحد والملحد بيقولها للمسلم .. والمسيحي بيقولها للاتنين .. يعني كل واحد مقتنع تمام الاقتناع انه صح .. يعني مش اجحاد .. ممكن يكون جهل .. لكن مش اجحاد .. ولفت نظري كلمة قالها واحد ملحد لشيخ .. قاله هل انا اخترت ان اكون ملحدا لاحجز مقعدا في جهنم ؟؟؟ اكيد لا .. اكيد هو اختار يكون ملحد عن قناعة تامة .. فيكون جزاءه النار خالدا فيها ؟؟
2. زوجات الرسول النقطة التانية هي نقطة زوجات الرسول التسعة .. ازاي ربنا يفرض على الناس كلها زواج 4 بس .. لكن الرسول يتجوز 9 ؟؟ ماتكلمنيش عن ظروفهم .. انهم كبار في السن او ارامل .. هل يسمح لي مثلا ان اتزوج 9 كبار في السن وارامل ؟؟ والقران دايما بيفكرنا ان الرسول بشر زينا .. وانه اسوة لينا
3. العبودية قصة العبودية في دماغي قصة كبيرة .. قريت كتير عن ان الاسلام جفف منابع العبودية وكلام من هذا القبيل .. ولكن .. ازاي الدين الخاتم للبشرية مايكونش قاطع وجازم في تحريم موضوع زي الرق دة ؟؟ يعني مثلا .. لو سالت اي واحد مسلم .. هل الرق حرام ؟؟؟ هل يقدر يقول انه حرام ؟؟ وسؤال تاني .. لو حاربنا اسرائيل دلوقتي .. او امريكا او حتى اثيوبيا .. واسرنا منهم .. وخليناهم عبيد وجواري .. هل دة بيخالف الدين الاسلامي ؟؟ ولا دة مسموح بيه عادي ؟؟ ومحدش يقولي ان الاسلام انهى العبودية .. لان العبودية انتهت من العالم المتحضر كله .. سواء كان مسلم او غير مسلم .. ومحدش بردو يقولي ان المسيحية واليهودية فيهم عبيد وجواري .. انا مش بقارن دين بدين !!!
4. قراءات القران .. نقطة القراءات الصحيحة للقران .. لو سالت اي مسلم .. ربنا حفظ القران بالمعنى فقط .. ام باللفظ والمعنى ؟؟ .. اكيد هيقول باللفظ والمعنى .. يعني ربنا لما نزل القران قال .. الملائكة الذين هم عند الله .. ولا الملائكة الذين هم عباد الله ؟؟؟ هييجي حد يقولي اللفظين صح .. يعني ربنا نزل الاية بلفظين ؟؟ ولا اللفظين من عند الرواة ؟؟ اكيد ربنا نزل الاية بلفظ واحد .. لكن الرواة اختلفوا في السمع او في الكتابة .. يبقى فين حفظ اللفظ والمعنى ؟؟؟ علما بان يوجد تقريبا 20 قراءة للقران .. وتقريبا 7 قراءات (صحيحة) ..طب ازاي ؟؟
5. العدل فين العدل في انسان اتولد مسلم من غير مايفكر ولا يجتهد .. وانسان تاني اتولد غير مسلم في اسرة غير مسلمة وبلد غير مسلم ؟؟ وحتى كمان كل اللي يعرفه عن الاسلام هو الارهاب ؟ واسف على الاطالة وانتظر جواب شافي .. واتمنى لا يكون مفصل اكثر من اللازم .. ولا يخرج عن محور الاسئلة ..