[ايسر]

السلام عليكم
كنت سالت نفس السؤال دة في المنتدى دة من زمااااان
ولسة السؤال دة في دماغي بقاله سنين .. بنام بيه واقوم بيه
السؤال بكل بساطة ...
لو انا دلوقتي فكرت في المسيحية او اليهودية او حتى البوذية واقتنعت بيها
ودخلت في ديانة غير الاسلام عن اقتناع .. ليه ربنا هيعذبني؟؟؟
لو قلت ان كل المؤمنين بالديانات دي مش عن اقتناع .. يبقى كلامك مش مظبوط ..
ولو قلت انهم اغبية ومقتنعين بدياناتهم .. يبقى عقاب الغباء الخلود في النار؟؟؟
ولو قلت انهم مهملين ومش بيدوروا في باقي الديانات .. هقولك المسلمين بردو مش بيدوروا
وكمان الخلافات بين الديانات مش كبيرة .. كل الاختلافات في حاجات غيبية .. لكن كلهم متفقين على الاداب العامة
والاخلاق .. ودي حاجات حتى الملحدين بيايدوها...
يعني زمان وانا صغير .. كانو يقولولنا ان المسيحيين كلهم .. حتى اللي في امريكا .. عارفين ان الاسلام هو الدين
الصحيح .. بس مش عايزين يدخلوه عشان يستمتعوا بالدنيا .. كان عقلي بيرفض الكلام دة .. لكن كنت بقنع نفسي
بيه بالعافية .... لكن دلوقتي .. انا عرفت ناس مسيحيين وعرفت انهم مقتنعين بدينهم تمام الاقتناع ...
والا ايه المتعة لما قسيس ولا راهب يقعد في دير في صحرا من غير جواز وفي عيشة قحط؟؟؟
عقلي دلوقتي بيقولي .. ان مفيش فرق بين مسلم .. مسيحي .. يهودي .. بوذي .. اي حاجة ... طالما عنده اخلاق
ومش بياذي حد .. لكن طبعا دة مخالف للاسلام تمام الاختلاف .....
ايه الصح .. معرفش !!!!
ويفضل نفس السؤال في دماغي طول الوقت .. ازاي ربنا يعذب مسيحي مقتنع تمام الاقتناع بالمسيحية؟؟؟
او يهودي مقتنع باليهودية ؟؟؟ .. او غيرهم مقتنعين باللي بيعملوه؟؟؟
اسف على الاطالة
منتظر الرد